لجنة الاعلام       لجنة الحريات       ابداعات الاعضاء                 

اتحاد المدونيين المصريين يرحب بكم ويتمنى ان تسعدوا بزيارتكم لنا

مؤتمر الحذق الوطنى …

كتبهامن ابداعات اعضاء(اتحاد المدونيين المصريين ) ، في 4 نوفمبر 2008 الساعة: 05:50 ص

احبائى زوار المدونة

اليوم لنا لقاء مع الصوت المصرى السياسى الساخر

الزميلة العزيزة / هدى صالح   سمراء النيل

ادراج ساخر طحن كما عودتنا

…..

 

على هامش مؤتمر الحذق الوطنى

تابعت سريعا  مؤتمر السيرك الوطنى  بسبب انشغالى فى لم الجمعية  من ستات العمارة  أصل كان فى 2 مدفعوش

فى الاول لاحظت مجموعه كلام وتصريحات ضرب نار مثلا

1- العداله الاجتماعية  ومكافحه الفقر
- شوفتوا الاستفزاز  ؟ ده لو كان بيكافح تسوس الاسنان كان  انجز
2- الوزيرين الجمل وأباظه قالوا ( ان سياسات الحزب تتميز بالمرونه  لمواكبه التغيير - بصراحه انا مش شايفه اى تغيير  سوى فى الملابس الداخلية -
3- زكريا عزمى  بيصرح ان عدد اعضاء الحزب  2مليون و898الف عضو - طيب بذمتك ده عدد يستدعى الفرحه؟
4- صفوت الشريف  يصرح بان  مصلحه المواطن هدف الحزب  أولا واخيرا
لاتعليق . ردوا  انتوا بقى
5-  نظيف بيؤكد ان مصر على الطريق السليم . يكونش قصده على الطريق السريع الى الجنان والتخلف؟
6- جمال مبارك  بيقول ان الاقتصاد المصرى حقق تطورا كبيرا خلال السنوات الاربع - لكن  لم يذكر التطور ده كان  فوق ولا تحت؟ - واضاف انه   لم ولن يتخلى عن المواطن . يانهار اسود  أبوس ايدك  سيب المواطن فى حاله
- واكد ان الحزب ليس حزبا لرجال الاعمال - وانه لايتستر على فاسد ولايعطى حصانه لآحد(   الطم؟)
- طبعا كان فى كلام كثير لجميع كوادر الحزب -  وكله  بيتكلم عن الاصلاحات والانجازات وان محدش عمل اللى عمله الحزب -
واخيرا  سمعت جمله شقية  من  نظيف قال ايه  اقتصادنا  قوى جدا خالص وبنوكنا  امنه وبلدنا مستقر بفضل سياسه وحكمة الرئيس
- وبعض الاعضاء اكدوا  على هذا التصريح  مع اضافه ان بلدنا بتتمرمغ فى العز - مع فكر جديد -  وقلب حديد

- طيب اوك  انا موافقه  بس ياريت حد يقولى ياترى الحزب كان بيوجه كلامه لمين ؟؟؟  اكيد لناس تانية وبلد تانية وزمن تانى -

باختصار ومن بين السطور  فهمت كده ان المؤتمر بيوصى  بتسليم قفا  الشعب للحزب - تصدقوا  احنا نستاهل   السيخ

أضف الى مفضلتك

• 
• 
• 
• 
• 
• 
• 
• 
• 
• 
• 

ـــــــــــــــــــــــــــــــــــــــــــــــــــــــــ
التصنيفات : سياسى | السمات:سياسى
أرسل الإدراج  |   دوّن الإدراج  

1. حسن محمد توفيق قال:
   نوفمبر 4th, 2008 at 4 نوفمبر 2008 11:04 ص

   العزيزة

   هدى

   ليس بجديد عليك هذه الشقاوة والتعبيرات التى تدل على وعى بما يدور حولنا

   اما بخصوص الحذق الوطنى لالالاانا اقصد الحزب الوطنى كنتى هتغلطينى انا صاحب

   عيال و بمشى جنب الحيط مليش فى الكلام ده …

   على العموم ادراجى الجديد عن جبر بسيط ورد عن هذا المؤتمر سوف اقوم بتحليله

   ربما نعرف نتواصل مع هؤلاء القوم .. ويارب ما يسلمليش قفى ابدا

   شكرا لك

2. هنــــد قال:
   نوفمبر 4th, 2008 at 4 نوفمبر 2008 2:38 م

   الغالية هدى ..

   جمال مبارك قال : انهم مش هيرفعوا ايدهم عن المواطن ..

   وانت عارفه ان ايدهم طارشه ..ربنا يفوتها على خير ..

   سنين سودا ..وعجاف ..!!

   دمتى بخير

   مودتى .

3. د.سامح إسماعيل قال:
   نوفمبر 4th, 2008 at 4 نوفمبر 2008 3:27 م

   الصديقة العزيزة هدى
   
   ايه بس اللى مزعلك
   
   الكلام كله صحيح
   
   1- طبعا في عدالة اجتماعية ومساواة بين الجميع في الفقر والقهر والجوع والمساواة في الظلم عدل
   
   2- أما المرونة فواضحة جدا يعنى تقدر تخالف اللوائح واالقوانين الجامدة وتسرق وتنهب زى ما انت عاوز هى دى مش مرونة ؟؟
   
   3- أما عن العدد فالعدد في الليمون ومش فارقة كتير هو احنا اصلا عارفين احنا كام !!
   
   4- وكلنا متاكدين ان مصلحة الشعب هى هدف الحزب اللى بيسهر على مصالحنا علشان ينهبها .
   
   5- أما حكاية الطريق فاحنا ولله الحمد ركبنا السريع بس نسينا نلف الجرار فمشينا لورا ودى مش مسئولية السواق .. الجرار السبب !!!!
   
   6- اما تطور الاقتصاد فواضح انه تطور خطوات واسعة الى درجة استحداث نظام اقتصادى فريد لا هو اشتراكى ولا ليبرالي ولا حتى طرق ثالث ….اقتصاد نهبوى تتعجب له الامم .!!

   بذمتك بقى يا اختى كلام الحزب فيه حاجة غلط
   
   احنا اللى شعب حقود حسود ما يملاش عينه الا التراب بس يا ترى متر التراب بكام دلوقت!!!!!!

   نسيت اقولك عاوز ادخل الجمعية بس اقبض الاول ؟؟؟؟

   منورة مدونة الاتحاد يا هدى
   

4. علي هادي قال:
   نوفمبر 4th, 2008 at 4 نوفمبر 2008 4:35 م

   السلام عليكم
   
   هدوء النيل
   
   الصوت السياسي الساخر
   
   لست مع من اطلق هذا الاسم عليك
   
   هدى صالح
   
   الانسانة المصرية صاحبة الكلمة والقلم
   
   لااقصد ان افرض اسمي او هذا الاسم
   
   هدى
   
   كل الاحزاب وعلى مر التاريخ سياسي ديني علماني الكل الكل
   
   كلهم يغنون على ليالهم
   
   ليلى التي تسكن صحراء غير مكتشفة وغير مستعمرة
   
   ويتمنون ان يحكموا اناس بلا اناس
   
   وبلد غير البلد
   
   لانهم ملاك ويكفي ان الجميع منتخبون ومن من منا لاننا وبقدرة قادر نذهب لننتخب
   
   ونقول نعم
   
   ولاتهتمي لمن يدعي الحرية والديمقراطية في زمن وبلد ووطن لاتوجد فيه هذه المسميات
   
   هدى صالح
   
   ايتها الانسانة لقد ترجمة الوثيقة
   
   والكتاب في مكائن الطبع
   
   سبعة ايام ويرى النور
   
   وعاهدت نفسي
   
   ان اكون قرب وليدي
   
   اسف على الازعاج

5. علي هادي قال:
   نوفمبر 4th, 2008 at 4 نوفمبر 2008 4:36 م

   هدى صالح
   
   اغلقت التعليقات
   
   لااسباب ربما تكون واهية
   
   اسف جدا

6. جيهان قال:
   نوفمبر 4th, 2008 at 4 نوفمبر 2008 7:16 م

   هدى

   يامجرمة تصدقى هقول لعيلتك انك لسة بتكتبى

   بس حقيقى حلوة قوى المرمغه بتاعه العز دى

   تحياتى يا صعيدية

7. مديحه قال:
   نوفمبر 4th, 2008 at 4 نوفمبر 2008 7:28 م

   هدى يامسترجله

   والنبى ترجعى عن اللى فى دماغك وتتجوزى ياصاحبتك وتخلفى 4 اولاد يطلعوا عينك

   بصى هو نظيف مكدبش احنا فعلا اقتصادنا قوى بش مش لاقيين ناكل فيها ايه؟

   حسبى الله ونعم الوكيل

8. طارق ومايسه قال:
   نوفمبر 4th, 2008 at 4 نوفمبر 2008 8:01 م

   السلام عليكم

   ازيك ياهدى

   بقولك ايه اقتصادنا جميل والدنيا حلوة والحياه فله

   ونظيفه واحنا الاتنين عندنا 3اولاد ومبسوطين والمرتب مكفينا وبنحوش منه كمان

   بس والنبى ابعتى الجمعية مش لاقيين ندفع الايجار

   صاحبتك مايسة وجوزها واولادها

   الشباب والرياضه

9. نمر عبدالرازق قال:
   نوفمبر 4th, 2008 at 4 نوفمبر 2008 8:07 م

   هدى
   
   ههههههههههههههههههههههههههههههههههههههههه
   
   كلام
   
   باين انو الملك مبارك وولي العهدج جمال عايزين ما يرفعو اديهم عن المواطن بالضرب على القفى وبس انت عارفه والله الواحد بطل يعرف شو بدو يقول
   
   المؤتمر الحذقي الوطني
   
   ده مؤتمر سفله نصابين وحرميه
   
   اسف على الشتم
   
   بس لبرمان كان شجاع وقال يروح مبارك لللجحيم
   
   والريس ساكت ولا كلمه لا حتى اكيد ضحك ضحكة الكبيره وقال ايه يعني حنحارب اسرائيل
   
   ده الفلسطينيين والاسرائيلين عايشين جنب بعض حنضرب مين ولا مين

   بس اخ
   
   دمت
   

10. هدى صالح قال:
    نوفمبر 4th, 2008 at 4 نوفمبر 2008 9:15 م

    في 04,تشرين الثاني,2008 - 01:38 صباحاً, محمود العزايزى كتبها …

    ده يا ست الكل مش مؤتمر ده احتفالية بجمال بك مبارك الرئيس القادم بقوة يشوف الوسية بتاعتو ويهيصلو شويتين شوفتى تتتنت سوزان وهى بتشد فى بابا حسنى زى ما يكون لعبة فى ايديها مش رئيس دولة ….واخيرا للك الله يا مصر ..

11. عبير حمدي-صحفية مصرية قال:
    نوفمبر 4th, 2008 at 4 نوفمبر 2008 9:16 م

    هاي هدي
    
    مش قلتلك امشي جنب الحيط بس بصراحة التوبيك نوت باد و نفسي اعملي ازالة لقطعة من لسانكه ههههههههههههه المهم انتي زعلانة لية من الحزب الوطني هما بيتكلموا و يقولوا انجزات و المعارضة بتقول ان قيادات الوطني مايدها و هي لا حول لها و لا قوة و احنا برضة بنتكلم يعني من الاخر كلة كلام في كلام و بعدين الفكر الجديد ال00000 تنبح و القافلة تسير يعني نتكلم و نتكلم و مفيش فايدة
    
    علي العموم يا هدي ياريت نفكر بشكل جدي في حلول عملية قابلة للتنفيذ في مصايبنا و مشاكلنا و نبحث عن اليات لتفعيلها و نحاول نوصلها للدنيا المهم نعمل حاجة
    
    و في النهاية كلها احلام و تصبحي علي خير
    
    ماتسيش الاجتماع يوم الخميس هعمل حسابك في ساندوتش فول

12. هدى صالح قال:
    نوفمبر 4th, 2008 at 4 نوفمبر 2008 9:28 م

    في 04,تشرين الثاني,2008 - 08:40 صباحاً, mohnnd elmnsoury كتبها …

    لى عندك عتاب كبير ياهدى يسمراء النيل أولا إحنا مالنا البلد بلدهم والحزن حزنهم ورجال الأعمال هم رجال أعمالهم هما معلش وبعدين إحنا شوية فلاحين فى خدمة هؤلاء جميعا ولكن حتى الأجرة بخلوا علينا بيهاوكلوا عرقنا يعنى احنا بتوع السخرةياست هدى وبعدين لو كان عددهم 3مليون تقريبا فمنهم حوالىتلاتة اربعة والباقى منافقين للتلاتة او للاربعة دول بس نفاق مدفوع التمن لان طباخ السم لازم يدوقه ولازم لازم يموت ونستريح من الطباخ وسيده

    هند ————– التعليقين دول على الادراج ده بس جم هناك

13. حمدى الطائر قال:
    نوفمبر 4th, 2008 at 4 نوفمبر 2008 9:41 م

    هدى
    
    اختى العزيزة جدااااا
    
    بصراحة قلمك فى منها القوة
    
    بس على فكرة هو نظيف بيقوال بنوكنا امانة
    
    هو بيقصد اى بنوك الاى ا تباعت ولا لاى بيفكر يبعها
    
    وبحاول يسوقها عشان يلقى مشترى ليها
    
    فكر جديد وقلب حديد
    
    هما لسة عندهم فكر تانى البلد خالصت خلص يترى بيفكرو يسرقو اية تانى
    
    ام عن القلب الحديد فدة مش جديد عليهما دة شعارهم من زمان ويكفيهما عز
    
    ابو الحديد كلة
    
    على فكرة هم فعلا بييكلمو ناس تانى وشعوب تانية حقيقى
    
    ليظهرو للعالم قمة الازدهار الذى يعيشة الشعب المصرى
    
    لنى ببسطة الشعب المصرى لا يهمه فى شى
    
    اصلو اخد على تسليم القفا
    
    دة هو سيب قفا من بدرى
    
    تحياتى ايتها الرائعة
    
    واشكرك على هذى الدعوة
    
    لنى حقا استمتع بقلمك
    
    تحياتى

14. هنــــد قال:
    نوفمبر 4th, 2008 at 4 نوفمبر 2008 9:47 م

    
    أستاذنا الكبير حسن …

    ايه رأيك فى الستات والبنات بتوع اتحاد المدونين المصريين ..؟

    احنا شغالين أهه و عايزين الاتحاد يكون و نكون معاه ..و يبقى حصن لينا

    ومنبر للدفاع عن حقوقنا فى الحرية والكتابة ..وملاذ لكل مصرى فقد حقه ..

    تحياتنا لك ..فمنك نستمد عزمنا للعمل .

15. هنــــد قال:
    نوفمبر 4th, 2008 at 4 نوفمبر 2008 9:51 م

    
    العزيز دكتور سامح

    أولا حمد لله على السلامة ..

    ثانيا نورت المدونة ..

    ثالثا انت عضو فى الاتحاد والا لا ؟

    احنا عايزين الاتحاد يتشرف ..

    ومنتظرين ادراج جديد تخص به المدونة ..

    بوجودكم تصير المدونة علامة بين المدونات .

    مودتى .

16. هنــــد قال:
    نوفمبر 4th, 2008 at 4 نوفمبر 2008 9:58 م

    
    الأخ الكريم على ..

    انت زعلان انى قلت على هدهود ” الصوت السياسى الساخر “..!!!

    والله هى مزعلتش منى ..وهى عارفه انى نفسى أقول فيها شعر ..

    شرفتنا هنا …وكل أصدقاء هدى أصدقاء لنا جميعا …ننتظرك دائما

    كل الود والتقدير .

17. هنــــد قال:
    نوفمبر 4th, 2008 at 4 نوفمبر 2008 9:59 م

    جيهان …

    اللى بيفتن بيروح النار ….!!

    أهلا بالجمال والشقاوة …

    ودى .

18. هنــــد قال:
    نوفمبر 4th, 2008 at 4 نوفمبر 2008 10:02 م

    
    مديحة ..

    انت عدو والا حبيب …ههههههههه

    أربع عيال …؟!1..ربنا يخلى

    ودى لك وللعيال .

19. هنــــد قال:
    نوفمبر 4th, 2008 at 4 نوفمبر 2008 10:04 م

    
    طارق ومايسه …

    أهلا بالشباب كله …والرياضة …

    ودى .

20. هنــــد قال:
    نوفمبر 4th, 2008 at 4 نوفمبر 2008 10:08 م

    
    الغالى نمـــر..

    نشكرك لاشتراكك فى احتفاليتنا التنكرية بالحذق الوطنى …

    يشرفنا مرورك دوما بمدونة ابداعات الاعضاء …

    فلا تغب عنا …

    ود وتقدير .

21. هنــــد قال:
    نوفمبر 4th, 2008 at 4 نوفمبر 2008 10:13 م

    الأخ محمود العزايزى …

    شرفونا دائما بمدونة ابداعات الاعضاء ..تجدوا ما يسركم …

    كل الود والتقدير .

22. هنــــد قال:
    نوفمبر 4th, 2008 at 4 نوفمبر 2008 10:18 م

    
    الجميلة عبير …

    أليات وتفعيل كمان ..لا ده انت أكيد مش فى مصر ..؟!!

    كل التحية لمرورك هنا …وننتظر طلتك دائما ..

    متنسيش السندوتشات وانت جايه …!!

    ودى .

23. هنــــد قال:
    نوفمبر 4th, 2008 at 4 نوفمبر 2008 10:22 م

    
    أخى الكريم mohnnd elmnsoury

    مين بقى اللى جاب سيرة الطبيخ دلوقتى …

    خلى الطباخ وسيده فى حالهم ..البلد شاطت منهم

    والسحابة السودة فى كل حته …!!!

    تقدير وود .

24. هنــــد قال:
    نوفمبر 4th, 2008 at 4 نوفمبر 2008 10:26 م

    
    الأخ الكريم على …

    لا والله يا أخى انت ظلمت الشعب المصرى بقولك انه أخد على تسليم القفا

    المصرى طول عمره ما يرضى بالمهانة ..بس هو صبور حبتين ..يمكن الظالم يلم نفسه ..!!

    أسعدنا مرورك ..

    تحياتى .

25. من ابداعات اعضاء(اتحاد المدونيين المصريين ) قال:
    نوفمبر 4th, 2008 at 4 نوفمبر 2008 11:02 م

    
    أحباؤنا الكرام ..زوار المدونة …

    تشرفنا بكم ..وندعوكم دائما للانضمام الينا دائما بتعليفاتكم ..

    وبادراجات من الاعضاء فى الاتحاد ..لننشرها بمدونة التميز هنا ..

    ننتظر تعاونكم لينهض كيان اتحادنا الوليد …

    دمتم بخير وابداع .

26. إشراف شيراز قال:
    نوفمبر 5th, 2008 at 5 نوفمبر 2008 12:14 ص

    ممكن أضحك الأول

    هههههههههههههههههههههههه

    سيبيني أكمل

27. إشراف شيراز قال:
    نوفمبر 5th, 2008 at 5 نوفمبر 2008 1:08 ص

    كلام خطيييير …و لذيذ …

    انت مش معقول …لديك موهبة رائعه ….و شجاعة ربنا يحميك منها ههههههههههه

    سخسخت من الضحك ….انا تابعت المؤتمر مرة باللغة العربية المشفرة و مرة مترجم

    كما هو أعلاه ……………..كوني في امان …

28. سحر مصطفى قال:
    نوفمبر 5th, 2008 at 5 نوفمبر 2008 2:21 ص

    صاحبتى الملسوعه هدى

    قصدك ايه ان جمال مبارك بيقول انه لم ولن يتخلى عن المواطن؟ ده مصمم بقى

    طيب وبعدين ؟ احنا هنروح فين ؟ اقولك خلينا عايشين فى العز لغاية مايظهر ليها أخر

    متنسيش كتب الكتاب يوم الجمعه فى السيده نفيسه

    سحر مصطفى - بالاذاعه والتليفزيون

29. طاهر الصوفانى قال:
    نوفمبر 5th, 2008 at 5 نوفمبر 2008 4:57 ص

    الاخوه في الاتحاد

    اسعد الله صباحكم

    ازيك ياهدي

    مش هتبطلي ولا هتجيبيها البر

    وشكلك هتودرينا معاكي

    والله عندي نص تعليق واجع بطني

    وهحزف النص التاني للفراخ يفطروا بيه عالصبح

    وبعتزر علي بعض الكلمات الخارجه

    او ابقوا بقي احزفوا التعليق ولا حتي احرقوه

    انا مقدرتش اكتب باقي القصيده هنا

    اقصد العصيده

    صباح الفل

30. طاهر الصوفانى قال:
    نوفمبر 5th, 2008 at 5 نوفمبر 2008 4:58 ص

    حزب وطني ولا واطي
    
    قال واسمه الديمقراطي
    
    حزب شلح واجري فيها
    
    ينعل أبوه اللي يحابيها
    
    وينعل أبويا ويا ابوكم
    
    لو سكتنا في يوم عليهم
    
    حزب لوطي نط واركب
    
    لو تحب لاعبني عنكب ؟
    
    كام وزير شاذ ومعاب
    
    علي كم بردة من الشباب
    
    يا سيدنا شيء
    
    لازم له شيء
    
    واهو كله يطلع في ا لغسيل
    
    سلم يا أريال علي برسيل
    
    اغسل ولمع في الفلوس
    
    لبنوك سويسرا شيل وعبي
    
    بيع ما تبقي علي النفوس
    
    يبقي غلبك ويا غلبي
    
    طز فينا يعني احنا إيه
    
    صال وجال وماخلا لينا
    
    يعني كنا قولنا ليه ؟
    
    حزب طاطي
    
    حزب اهرش تحت باطي
    
    وطي هات اللي بينزل
    
    ومالكش دعوي ببين بطاطي
    
    هو طالع وانت نازل
    
    مابين مصيلحه وبين غطاطي

31. طاهر الصوفانى قال:
    نوفمبر 5th, 2008 at 5 نوفمبر 2008 5:00 ص

    حزب وطني ولا واطي

    قال واسمه الديمقراطي

    حزب شلح واجري فيها

    ينعل أبوه اللي يحابيها

    وينعل أبويا ويا ابوكم

    لو سكتنا في يوم عليهم

    حزب لوطي نط واركب

    لو تحب لاعبني عنكب ؟

    كام وزير شاذ ومعاب

    علي كم بردة من الشباب

    يا سيدنا شيء

    لازم له شيء

    واهو كله يطلع في ا لغسيل

    سلم يا أريال علي برسيل

    اغسل ولمع في الفلوس

    لبنوك سويسرا شيل وعبي

    بيع ما تبقي علي النفوس

    يبقي غلبك ويا غلبي

    طز فينا يعني احنا إيه

    صال وجال وماخلا لينا

    يعني كنا قولنا ليه ؟

    حزب طاطي

    حزب اهرش تحت باطي

    وطي هات اللي بينزل

    ومالكش دعوي ببين بطاطي

    هو طالع وانت نازل

    مابين مصيلحه وبين غطاطي

32. عرباوي قال:
    نوفمبر 5th, 2008 at 5 نوفمبر 2008 5:49 ص

    هدى

    ليه ياهدى قفلتي التعليقات في وش عرباوي

    ربنا يهديكي ياهدى

    ويسترها علينا وعليكي

    أسلوبك فكاهي ولكن لاذع جدا

    وعرباوي بحيي كل الزائرين

    وتحية خاصة للأخ حسن محمد توفيق والأخت هند

33. وافق أصيل قال:
    نوفمبر 5th, 2008 at 5 نوفمبر 2008 6:17 ص

    تحياتي

    عرفت كثير ..لكن وقاحة زي دي ما عرفت..ولا قريت الا عندنا..في بلدي الجزائر..
    
    الرئيس يقر بفشله الذريع الذي انجزه بامتياز في العهدتين الرئاسيتين السابقتين..
    
    ثم يقرر تحريف الدستور من أجل البقاء على رؤوسنا مدى الحياة..لأن دستورنا لا يمنح
    
    للرئيس حق الترشح للرئاسة الا مرتين..فهو يريد لأنه رئيس فاشل باعترافه هو نفسه عن نفسه ..يريد جعلها ابدية..مع العلم لو كان متزوج وله ابناء لورثهم في الحكم ولصرنا مملكة
    
    لكنه يفكر ان ينشيء منصب نائب رئيس ..وسيكون أخوه بالطبع..وهو من سيورث ابناءه
    
    لحكم الجزائر على مدى العمري العائلي وليس الفردي وحسب..وانظري المصيبة التي
    
    اوصلنا اليها طاغية الجزائر الذي لم تعرف نظيرا له..

    حسبنا الله ونعم الوكيل..

34. عرباوي قال:
    نوفمبر 5th, 2008 at 5 نوفمبر 2008 7:44 ص

    رسالة إلى أوباما

    أوباما

    أنت الأن رئيس أكبر دولة في العالم

    وصاحب أكبر جيوش العالم

    .
    
    .
    
    .
    
    .
    
    .
    
    .
    
    .
    
    ما رأيكم

    يهمنا تعليقكم

    عرباوي

35. mohamed marouf قال:
    نوفمبر 5th, 2008 at 5 نوفمبر 2008 8:04 ص

    السلام عليكم :
    
    الهدهدة : هدى
    
    إنت أحذق من أحذقهم أصحاب الطابق 1 و 2 ،،أنا مقهور وفخور بقهر قاهرتي ..
    
    وزائرتي ليس بها حياء ..فليس تزور إلا في الظلام ..
    
    ******************************************************************
    
    علامتك 10/10 إنت أذكى بنات الصف هدى لمّا عرفت من قتل الأستاذ ..
    
    ******************************************************************
    
    روحي انثري بضعة بللورات ملح على كفّك وشوفي حظي إيه لمّا أكبر يعني انضج وأصبح مؤهّل للحفاظ على أسرار وأمن أصحاب الطابق 1 و2 ..
    
    ******************************************************************
    
    كوني بخير

36. هيثم ابوخليل قال:
    نوفمبر 5th, 2008 at 5 نوفمبر 2008 12:32 م

    جملة واحدة تعليق علي فوز أوباما

    لن تفرق .. جزمة برباط أبيض أو جزمة برباط إسود

    كلها جزمة ..سيتم ضربنا بها …!!

37. علي ابراهيم قال:
    نوفمبر 5th, 2008 at 5 نوفمبر 2008 1:51 م

    واحنا مالنا بمؤتمرهم او بلدهم
    
    الجماعه شاربين بالقرش كله وعمالين هرتله
    
    لما يصحوا من غفوتم
    
    يومها نبقي نهتم بالمؤتمر او المؤامره
    
    ………………….
    

38. هدى صالح قال:
    نوفمبر 5th, 2008 at 5 نوفمبر 2008 2:38 م

    هنود

    ممكن اعلق انا كمان على مؤتمر القهر الوطنى؟؟؟

    من تصريحات سيدنا جمال مبارك - انه مش هيرد على المعارضين الوحشين

    الشريرين لآنه لن ينزلق لهذا المستوى

    والنبى ياهند - برجاء عدم دخول المنزلقين والمعارضين هنا للتعليق

    دمتى مفروسة

39. حامد صابر الريانى قال:
    نوفمبر 5th, 2008 at 5 نوفمبر 2008 7:54 م

    السلام عليكم

    انها اللعبة السياسية ذاتها التى تكتنف كل الانظمة العربية وكلا يخترع الاطار المناسب لتمرير كذبته والنتيجة هى الضحك على الذقون وعلى الجماهير البسيطة من اجل الاستمرارية فى مقاعد الحكم وضمان مصالح فئة القلة على حساب مصالح الشعوب
    
    ولكن يوما ما لن يبقى من هؤلاء سوى الاطلال وغدا لا ناضره قريب
    
    اخيكم الريانى

40. هنــــد قال:
    نوفمبر 5th, 2008 at 5 نوفمبر 2008 9:36 م

    
    العزيزة اشراف …

    هدهود تقدم لنا دائما قراءة أخرى للأحداث

    قراءة ترسم البسمة مكان الغم والهم ..

    نورتى المدونة ..ابداعات الاعضاء تنتظرك

    كونى معنا .

    مودتى .

41. هنــــد قال:
    نوفمبر 5th, 2008 at 5 نوفمبر 2008 9:39 م

    
    الصديقة سحر مصطفى …

    طبعا عايشه فى عز ..و حديد كمان ..تنكرى ؟

    خلينا أحنا فى كتب الكتاب ..مبروك للعروسين ..

    ودى .

42. هنــــد قال:
    نوفمبر 5th, 2008 at 5 نوفمبر 2008 9:48 م

    
    صوفانى الجميل ( بالعامية ..الفصحى لا )

    بقى هدى برضه اللى مش هتجيبها البر

    وهتودرنا ..؟!!والله انت اللى هتخدنا بقصايدك

    وأنا وهدى بق وبس ..ساعة الجد تلاقينا نعيط..ههههه

    دائما نريدك هنـا..

    ومنتظرة قصيدة مكتوبة مخصوص لمدونة الابداع ..

    انت مش من معانا فى الاتحاد برضه …؟!!

    ودى .

43. هنــــد قال:
    نوفمبر 5th, 2008 at 5 نوفمبر 2008 9:51 م

    
    عرباوى ( ميقولش غير الحق )

    وتحية لك من الجميع ..

    أهلا بيك .

44. هنــــد قال:
    نوفمبر 5th, 2008 at 5 نوفمبر 2008 9:55 م

    
    أخى وافق …

    الظاهر لازم الشعوب تكافح تانى لنيل استقلالها

    بس المرة دى من الطواغيت الذين استحلوها …!!

    مرورك عطر المدونة .

45. هنــــد قال:
    نوفمبر 5th, 2008 at 5 نوفمبر 2008 10:09 م

    الأخ محمد معروف ….

    طبعا هدى 10/10 ..واللى قتل الاستاذ صمتنا و تهاوننا

    فى ثوابتنا وتقافتنا ووعينا …يا ترى هنسكت كتير لسه ؟

    كل اصدقاء هدى ..أقلام رائغة ..وانت منهم .

    ودى .

46. هنــــد قال:
    نوفمبر 5th, 2008 at 5 نوفمبر 2008 10:13 م

    
    أخى هيثم …

    ليه بس تزعلنى كده ..يعنى احنا خدنا على الضرب خلاص ؟!!

    مش كفايه بنتضرب بالكرباج فى الدول ” الشقيقة “..؟!1

    الا همه وصلوا للجلدة رقم كام دلوقتى ..مهزلة سعودية !!

    فين الادراج يا حاج هيثم .؟

    ودى

47. هنــــد قال:
    نوفمبر 5th, 2008 at 5 نوفمبر 2008 10:21 م

    
    الشاعر الغالى على …

    والله الناس الاكابر عايزينلنا المصلحة ..

    اللى انت عملت البطاقة الذكية بتاعتك ؟!1

    بيقولوا دى اللى هتحل كل مشاكلنا فى البلد

    انت تحطها قدامك كده وتقولها :

    يا بطاقة يا ذكية أنا عايز عربية ..تلاقى العربية

    حضرت فى الحال قدامك ..دى تكنولوجيا نظيف ..!!

    الا من حق أخبار الشيشه ايه ..؟…هههههههه

    مودتى .

48. هنــــد قال:
    نوفمبر 5th, 2008 at 5 نوفمبر 2008 10:24 م

    هدهود..

    صاحبة الفرح الجميل ده والليلة الحلوة

    والله عملتى للمدونة حس …

    دمتى شقية .

49. هنــــد قال:
    نوفمبر 5th, 2008 at 5 نوفمبر 2008 10:28 م

    
    الليبى الشقيق حامد..

    ” الضحك على الدقون “…ههههه

    انت بتتكلم مصرى خالص ..؟!!

    لا ..حتى الاطلال لن تبقى منهم

    سيصيروا عدما خالصا ..

    فهذا ما يستحقونه ..

    مودتى .

50. كريم ديكابريو قال:
    نوفمبر 5th, 2008 at 5 نوفمبر 2008 11:52 م

    هدى اللذيذة //
    
    وبعدين معاكى ايه الشقاوة دى بقى ارسى على بر
    
    هو ادراجك هنا ولا فى مدونتك المهم الكلام ده مع انك
    
    بتقدميه بطريقه ساخرة بس الواحد بيموت من الخوف
    
    وياترى ايه اللى هايحصل بكره والناس نايمة فى العسل
    
    وعاجبها الوضع وعلى راى المثل ربنا يخليلنا المسؤلين
    
    تحياتى لكى اختى هدى واسف على تاخيرى لانى انتى
    
    عارفة انى مانى فاهمة انى مش من هنا بقى معلش
    
    وتحياتى لكى اختى هند ويارب استرها على مصر حبيبتك.

51. طاهر الصوفانى قال:
    نوفمبر 6th, 2008 at 6 نوفمبر 2008 3:31 ص

    صباح الخير ياهند انتي وسمراء مصر الجميله هدي

    اهو انتو بقي حدفتوني وخلتوني اكتب كلمتين اللي كانوا وجعيني

    صباح الفل

    ومن غير عياط

52. حسن محمد توفيق قال:
    نوفمبر 6th, 2008 at 6 نوفمبر 2008 4:37 ص

    بسم الله ماشاء الله

    هو ده شغل الستات ولا البنات

    مش شغل الرجاله الوحشين ..

    كده المدونة بقى ليها حس وموجودة كمان فى الاكثر تعليق

    شكرا اخواتى

    2h

    حلوه دى

    صح

    شكرا لك عزيزتى ******* ( هند ) *******

    واتمنى سرعة اختيار باقى اعضاء المدونة ممن لديه الرغبه فى العمل معنا

    لاختيار الاعمال المتميزة وعرضها على باقى المدونين وياريت تكون معاكى

    هدى صالح …شكر لكما على هذا المجهود الرائع

53. عرباوي قال:
    نوفمبر 6th, 2008 at 6 نوفمبر 2008 7:29 ص

    سر قوتهم هو المال

    المال ؟

    أوراق لا يعترف بها عرباوي

    ذهب ؟

    لن ترتدي نساء وبنات عرباوي ذهبا

    عرباوي عنده بضاعة تسقط النظرية الورقية

    وعنده مقومات وحدة ونهضة قوية

    ومن ضد الوحدة ؟

    الحكام ؟

    الشعوب ؟

    الوحدة نحن نصنعها

    الوحدة أرادة نفسية

    عرباوي مش شايفكم مؤهلين للوحدة

    وكيف ممكن تنفيذ هذا الأتحاد

    لنبدأ بأساس أتحادنا

    جامعة الدول العربية

    على جامعة الدول العربية أعلان حالة من الطوارئ والأستنفار

    وتعلن الوحدة العربية الكاملة

    وحدة الموقف السياسي

    ونساندها بكل قوة

    عرباوي يثق في قدرة السيد عمرو موسى

    ويناشد القادة العرب بالتجمع وأتخاذ مواقف جادة

    ونطالب

    بتكوين جيش عربي قوي تشارك فيه جميع الجنسيات العربية والمسلمة

    يتسلم هذا الجيش العربي مقاليد الأمور وحفظ الأمن في العراق والصومال وفلسطين

    وليخرج المحتل

    وليخرج المحتل

    والشيئ الوحيد الذي يهدم نظرية الوحدة العربية

    هي الثروات

    ثروات ضاعت تماما وحرقت وتحولت لمعلومات فقط

    أين أموال شاه أيران يا غرب ؟

    أين أموال صدام

    أين أموال العرب

    سايكس بيكو نجحت في سلب أموالنا

    نعم نجحو

    ولكن الحل في تمزيق حدودنا العربية

    وأنتخاب رئيس لكل العرب يبدأ شرفيا

    وتبدأ الشعوب في تكسير الحدود المعنوية

    ونحاول مساعدة أنفسنا من أجل حياة كلها أمل وعمل وأنتماء

    نصنعها من أجل أبنائنا الأعزاء

    عرباوي

54. عرباوي قال:
    نوفمبر 6th, 2008 at 6 نوفمبر 2008 7:34 ص

    الأخوة الأفاضل لوسمحتم

    حكوماتكم رمز لكم

    لن تنسفو حاكما بمقال

    ولن تزيلو سلطان يعطيه الله

    ترابطو وتنافسو على خدمة بلادكم

    الحاكم صورة مركبة من المحكومين

    ترابطو فالعدو أكل ونهب وسلب في أملاككم

    ولكم الأختيار والقرار

    طالبو بحقوقكم

    ولا تثيرو الفتن

    ولكم الله ولأولادكم

    فنحن في أسوأ حالاتنا

    ونتمنى من الله العلي القدير

    أن لا يسوء حالنا أكثر

    عرباوي

55. عادل الطاهر الحفيان قال:
    نوفمبر 6th, 2008 at 6 نوفمبر 2008 2:07 م

    مساء الشقاوة :-

    العزيزة هدى
    أما بعد

    سُعدت بمطالعة مدونتك و هذا الموضوع خاصةً
    الشعب المصري عظيم
    هل تسمحي لي بنشر نص عندكِ سيكون خاص بمدونتك عن المصريين هو شعر بلهجتكم تقريبا
    أنا من ليبيا و لي مدونة أتمنى أن أوصلها لأهل مصر الكرام
    سبق و كتبت نص للشاعر احمد فؤاد نجم مند سنتين تقريبا عندما دخل المستشفى بعد إصابته بوعكة صحية في القلب
    فحاولت أن أتقمص شخصيته و كتبت نص متواضع

    *******************************************
    ألف سلامة عليك يا أُسطى

    قالوا شاعرنا صابتو الجلطة

    ُقلت:.. ألف سلامة عليه الأُسطى

    مش خايف منْ بطش الشُرطة

    و لا خايف من غضب السُلطة

    و لا كان يهرب و لا كان يهرب

    عشان هو مش عامل غلطة

    طول عمرو كان واد غلبان

    بياكُل مش و بيزرع حنطة

    دا ما كنشي بيحط الربطة

    و لا كان يعرف معنى الصمت

    و لا كان و لا كان ..ألخ

    على آخر السطر ما تحطش نُقطة

    يا ربي رجعلو الصحة

    و يفضل شوكة في جنب السُلطة

    يا ربي إدي لو إلهام

    بلون العسل و طعم القشطة

    ألف سلامة ليك يا أُسطى

    على باب بيتي حعلق يافطة

    يعمر بلدي و تخرب مالطا

    ـــــــــــــــــــــــــــــــــــــــــــــــــــــــــــــــــــــــــــــ

    النص نهدى للشاعر :..أحمد فؤاد نجم بعد أن قرأت نبأ دخوله العناية الفائقة بعد إصابته بجلطة

    ألف سلامة يا أُسطى

    عادل الطاهر الحفيان

    ليبيا

    شكرا لك و اتمنى ان اسمع منك قريبا

56. عادل الطاهر الحفيان قال:
    نوفمبر 6th, 2008 at 6 نوفمبر 2008 2:10 م

    و لا كان يكذب و لا كان يهرب
    هو أصلاً مش عامل غلطة

    ((تصحيح فقط))

57. هدى صالح قال:
    نوفمبر 6th, 2008 at 6 نوفمبر 2008 8:02 م

    الاخ حسن اخونا اللى بيشجعنا

    الاخت هند - النشيطه اللى عامله شغل على ودنه

    انا زعلانه منكوا جدا لانكوا خطفتوا اصحابى منى

    وناوية ابعتلكوا عمو الشرير يفجر المدونه دى ونخلص بقى

58. علي ابراهيم قال:
    نوفمبر 6th, 2008 at 6 نوفمبر 2008 9:35 م

    بيني وبينك يا وطن افه
    
    مليون خرافه وخرافه
    
    بيني وبينك وجع
    
    وعصابه خطافه
    
    ……………
    
    نستاذنكم
    
    اتينا لعرض جديدنا القديم

59. fatma attia قال:
    نوفمبر 6th, 2008 at 6 نوفمبر 2008 10:19 م

    هدى الحبيبة:
    
    بصراحة أنا ما استحملتش أتفرج على امؤتمر المذكور أعلاه .. لأني بصراحة عندي ارتفاع في ضغط الدم .. بس سمعت بعض الكلمات المأثورة على لسان الصفوة منهم ..حاجة تفرح القلب الحزين .. اللي يشتم .. واللي يتريق .. واللي يقول أنا لا أكذب ولكني أتجمل
    
    فكروني بجيراني في العشوائيات لما يقعدوا يردحوا لبعض .. وانتهى المؤتمر بتمثيلية هابطة جدا .. أعدوا لها من سنة فاتت .. وجابوا نماذج مشرفة ساعدهم الحزق الوطني وخلق منهم مواطنين صالحين .. والله تمخض الجبل فولد فأرا .. حزب بقى له سنين كاتم على أنفاسنا يدوب ساهم في خلق كام مواطن صالح……..تفتكري محتاجين لكام مليون سنة عشان نخلي مصر كلها صالحين ……….آه يا بلد .. ياللي يزرعوا فيك القمح في سنين يطلع القرع ف ثواني
    
    سيبك من الحزب وتعالي زوريني في مدونتي .. يمكن تلاقيني باتجمل أنا كمان ..

60. هنــــد قال:
    نوفمبر 6th, 2008 at 6 نوفمبر 2008 10:29 م

    الأخ العزيز على …

    يا ترى جديدك ده هتعرضه عندنا هنا ..

    والا هتعرضه فى “امسك قلم “..؟

    لو هتعرضه هنا وهناك

    التعليقات هتتوزع بين القبائل

    قصدى بين المدونتين ..

    وتحير أصحابك يعلقوا هنا والا عندك ؟!

    أحنا هنا زى الفريك منحبش شريك ..

    يعنى الادراج بناخده من بابه ..

    قلت ايه يا شاعر ؟

    تخلى الادراج مش فى صدر المدونة

    لحد العرض الأول هنا ما يخلص ..

    منتظره ردك سريعا .

    مودتى .

61. هنــــد قال:
    نوفمبر 6th, 2008 at 6 نوفمبر 2008 10:30 م

    
    هدهد ..

    كده سايبه صاحبتك لوحدها ترد على زوارك الكتير ..!!

    انت مستخبيه من حد يا هدى ..؟!!

    خايفه يلموا اللى بيشتغلوا فى المدونة ..؟!!

    آه يا مكارة …متخافيش مشيوا خلاص

    اظهر وبان عليك الأمان ..

62. طارق الغنام قال:
    نوفمبر 6th, 2008 at 6 نوفمبر 2008 10:34 م

    هدهد
    
    قلم دة يلبنتى ولا سيف
    
    يسلم قلمك
    
    تقبلى تحياتى
    
    ودمتى قلم لا يخاف لومه لائم
    

63. هنــــد قال:
    نوفمبر 6th, 2008 at 6 نوفمبر 2008 10:38 م

    العزيزة فاطمة …

    هدى مطنشه زوارها خالص ..اسمحيلى أرد بدالها

    أنا زرت مدونتك انت جميلة فعلا وكتاباتك زيك …

    ننتظر أن نحظى بأحد ابداعاتك لعرضه هنا ..

    ودى .

64. هدى صالح قال:
    نوفمبر 6th, 2008 at 6 نوفمبر 2008 10:41 م

    طارق الغنام اخونا فى الهم التقيل

    شكرا لتعليقك - ويارب يسترك ويبعد عنك شياطين الحزب

    منتظرين ابداعاتك ياشقيق

65. هدى صالح قال:
    نوفمبر 6th, 2008 at 6 نوفمبر 2008 11:06 م

    الاخ عادل الطاهر

    شكرا لزيارتك وتعليقك الجميل

    وشكرا تانى لنصك البديع ———- واهلا بيك فى اى وقت

    وتحياتى لاخواتنا فى ليبيا

66. سجين الوطن( عماد حمدى ) قال:
    نوفمبر 8th, 2008 at 8 نوفمبر 2008 4:25 ص

    ((((((((((( شقيقتـــــــــــــــى هــــــــــــــــــــــــــــــــــــــــــــــــدى )))))))))))))))))))

    “:”:”:”:”:”:”:”:”:”:”:”:”:”:”:”:”:”:”:”:”:”:”:”:”:”:”:”:”:”:”:”:”:”:”:”:”:”:”:”:”:”:”:”:”:”:”:”:”

    زعلان جدا …. انتى رحتى عند هند .. وانا اعرف منين الا ان تجينى دعوة

    والله صدفة انى عرفت من مدونة واحد زميلنا …

    المهم انا عترت عليكى ….

    بطلى تريقة على خلق الله … انتى لو كنتى حضرتى المؤتمر كنتى قلتى كلام غير

    ده خالص … عارفة اللى حضروا المؤتمر كل واحد اخد ايه ..( عارفة اخدوا ايه ؟؟؟؟؟؟ )

    كلهم وزعوا عليهم صابون وكل واحد اخد صابونه … ها ايه رأيك مش كده وبس

    ووزعوا عليهم طبيخ فى اعمدة الاكل … وكل واحد أخد عامود .. ها مش يستاهلوا

    العمدان دى والنبى ….

    وكمان وزعوا عليهم حاجه جميلة … وزعوا فطير وكل واحد أخد فى طيره

    يعنى احنا مش عاجبنا حاجه خالص ..يعنى كل اعضاء الحزب اخدوا صابونة وعامود واخدوا

    في طيرهم …. يعنى وجبة كاملة يا مفتريه …

    اهم حاجه ان ( العـضـــــــــــــــــو ) يكون مبسوط

    ((( الحمد لله اننا مش اعضـــــــــــــــــــــــــــــــــــــــــــــــــــــــــاء )))

    باى باى بقى عشان كده روحنا ف داهية …

67. مجهول قال:
    نوفمبر 8th, 2008 at 8 نوفمبر 2008 7:20 ص

    السلام عليكم :
    
    هدهدة النيل :
    
    ******************************************************************
    
    من قال أن الأوباما الأبيض الجديد في البيت الأسود القديم سينزل بردا وسلاما على الحفاة العراة رعاء الشاء والنتسبي إلى أعدل وأسمح دين على وجه الأرض ،،مناشدتي ليست للمبارك أوباما بل هي لبابانا المبارك والذي تهمّنا بركته قبل شبابه وكفاءته والذي يسير بخطى ثابتة لدسترة تأبيد الرياسة وماجاورها لنسائله إلى أن يرث الله الأرض وما عليها ،،هو الذي أناشده بتعميم الحلم …
    
    إنت ظاهر عليك ما تشربيش قهوة وشاي وشيشة ومش عارف إيه …
    
    ****************************************************************
    
    طاب يومك بكل خير

68. مجهول قال:
    نوفمبر 8th, 2008 at 8 نوفمبر 2008 7:25 ص

    السلام عليكم :
    
    عندي شوية مشاكل تقنية لإدراج التعليقات والدخول إلى مدونتي ،،شيء ما طرأ ومع ضعف حيلتي في عالم المعلوماتية أنا في ورطة ، إذا كنت تسطيعين مساعدتي عجّلي بالنجدة

    مثال :رغم ظهور الإسم يظهر بدله مجهول ..
    
    السلام عليكم :
    
    هدهدة النيل :
    
    ******************************************************************
    
    من قال أن الأوباما الأبيض الجديد في البيت الأسود القديم سينزل بردا وسلاما على الحفاة العراة رعاء الشاء والمنتسبي إلى أعدل وأسمح دين على وجه الأرض ،،مناشدتي ليست للمبارك أوباما بل هي لبابانا المبارك والذي تهمّنا بركته قبل شبابه وكفاءته والذي يسير بخطى ثابتة لدسترة تأبيد الرياسة وماجاورها لنسائله إلى أن يرث الله الأرض وما عليها ،،هو الذي أناشده بتعميم الحلم …
    
    إنت ظاهر عليك ما تشربيش قهوة وشاي وشيشة ومش عارف إيه …
    
    ****************************************************************
    
    طاب يومك بكل خير

69. هدى صالح قال:
    نوفمبر 8th, 2008 at 8 نوفمبر 2008 10:34 ص

    الاخ محمد معروف

    اوباما هيكون اسوأ من بوش واكثر توحش

    ——– وياريت تكتب شكوى لمكتوب ——– عن ماحدث بمدونتك

    حتى يتم تصليحها

    شكرا اخى الفاضل

70. هدى صالح قال:
    نوفمبر 8th, 2008 at 8 نوفمبر 2008 10:39 ص

    الاخ عماد - سجين الوطن

    انا طبعا بعتلك دعوة - لكن انت مختش بالك من بريدك

    ولما ارجع انشاء الله —- من اجازتى — عايزين نشوف ابداعاتك يابطل هنا

    عند هنود —— واخونا حسن المشجع الاول لينا

    اما عن مؤتمر السيرك الوطنى - فانا مش بتريق لا

    انا بس زعلانه ومضايقه لانى لم أحصل على ال30 جنيه اللى فرقوها

    على العيال اللى هتفت — وعلبه العصير

    شكرا لك - ودت بخير

71. منى الشيمي( صفصافة ) قال:
    نوفمبر 11th, 2008 at 11 نوفمبر 2008 5:26 م

    يا هدى
    
    لم أعد أهتم في أي بلد نعيش
    
    ولا أي حكومة تحكمنا، ولا أي اقتصاد نعيش تحت مظلته
    
    لست وحدي
    
    كل زميلاتي وزملائي في العمل
    
    لقد انفصل الواقع والشعب عن الحكومة
    
    انشغلنا بتوفير لقمة العيش
    
    عندما اقول لقمة العيش لا أقصد توفير مال
    
    فقط ما يسد الجوع..
    
    ما يسد الجوع
    
    سحقا لهم

72. هدى صالح قال:
    نوفمبر 11th, 2008 at 11 نوفمبر 2008 7:38 م

    منى

    كلنا لم نعد نهتم باى شىء سوى مايسد الجوع

    بعد ان فقدنا احساسنا كبنى ادمين - وتجمدت ملامحنا لتصبح مسخ ليس له معنى

    لكن

    الى متى؟؟؟؟

    دمتى راقية يامنى

73. ayatluzumy قال:
    ديسمبر 13th, 2008 at 13 ديسمبر 2008 9:13 م

    من اجل مصر
    
    شارك في الحملة الشعبية للقيد بالجداول الانتخابية وادعو غيرك
    
    ضع بنر الحملة علي مدونتك
    
    البنر موجود علي مدونتي
    
    اذا كنت ترغب في وضعه علي مدونتك ارسل ميلك كي ارسل لك كود البنر
    
    ارجو المعذرة للدخول بلا مقدمات لأني ادخل علي مئات المدونات يوميا
    
    http://www.moatnondedelsh3ab.blogspot.com
    
    م/ الحسيني لزومي
    

اكتب تعليــقك